يعني ايه كوتش؟؟؟
 |
يعني يبقي في شخص مدرب علي انه يساعدك انك تعرف نفسك و بالتالي يساعدك تعرف تحدد اهدافك و كمان ازاي تحط خطه عشان تحققها. من اهم الحاجات اللي هيساعدك فيها كمان هي انك تعرف معتقداتك و خصوصا المعتقدات الي بتقيدك و اللي بتخليك متحققش اهدافك.
طيب لازم يعني اللايف كوتش ؟؟ مانا ممكن احط لنفسي خطه و امشي عليها ؟؟
الابحاث اثبتت ان الكوتشينج بيضاعف احتمالات و نسب نجاحك. طيب ليه النسبه بتزيد؟
ناخد المثال بتاع مدرب الجيم. انت لو بتروح صاله الجيم لوحدك ح تعمل نتايج احسن و لا لو مع مدرب جيم محترف ؟؟ طبعا مع مدرب الجيم لانه فاهم ازاي يطلع منك احسن حاجه. نفس الكلام مع اللايف كوتش هو عارف ازاي يساعدك عشان تعرف نفسك كويس و تعرف انت عايز ايه؟
و كمان مع اللايف كوتش حيساعدك تعرف اهدافك و يساعدك تحط خطه تقدر انت تحققها. و كمان مش بس ح تحقق اهدافك لا انت كمان حتتطور بسرعه اكتر بكتير من لو كنت لوحدك.
كمان نسبه النجاح يتزيد عشان اللايف كوتش يقدر يحفزك انك تطبق الخطه اللي تحقق اهدافك و ده عن طريق جلسات (Sessions) تتعمل علي فترات مناسبه ليك و لاهدافك
طيب ايه اللي ممكن تعمله مع لايف كوتش:
· تحديد وتحقيق أهدافك
· تحقق التوازن بين العمل والحياة الشخصية
· المساعده في اتخاذ القرارات المصيريه (مش بياخدها نيابه عنك)
· المساعده في تحسين علاقاتي مع اللي حواليا
· تحديد و معرفه القيم الأساسية و المعتقدات ( زي المعتقدات اللي بتقيد خطواتنا و تمنعنا اننا نحقق اهدافنا)
· وحاجات تانيه كتير…
يعني كلنا مر بينا في حياتنا موقف او اكتر بنبقي محتارين او مش عارفين نعمل ايه. شوفوا كده المواقف اللي تحت دي. هل مر عليك حاجه منها او زيها؟
هل حسيت في وقت انك مش عارف تعمل ايه؟ او تتصرف ازاي؟
· يا تري اروح الوظيفه دي ولا ابدأ مشروعي الخاص؟
· انا مش عارف اتعامل مع اللي حواليا
هل حاولت مره تحدد هدف معين و معرفتش تحققه؟؟
· مثلا انزل وزني و آكل اكل صحي. و كل مره وزني يزيد مش ينقص...
ماجاش في بالك السؤال ده ... أنا مش عارف انا عايش ليه ...
او حاسس ان حياتك ملخبطه و ضايعه في حاجات مش هي اللي انت عايزها ...
انا زهقت ... الشغل واخد كل وقتي و مافيش وقت لاي حاجه تانيه ...
كلنا مرينا بمواقف زي دي. شاركونا تجاربكم و ازاي اتصرفتوا في المواقف دي.
