انا مطحون و زهقان و مش عارف اعمل ايه؟؟
انا مطحون و زهقان و مش عارف اعمل ايه؟؟
ليه يابني بس مالك في ايه ؟؟
ليه يابني بس مالك في ايه ؟؟
مش عارف انا حاسس ان حياتي مش متظبطه ... بس مش عارف ايه بالظبط !!
كل ما اشد نفسي في حاجه و اقول هي دي اللي حتظبطلي حياتي ... ارجع تاني و الاقي اني برضه مش مبسوط.
دي حاله ممكن نكون كلنا تقريبا مرينا بيها و جالنا نفس الاحساس ده.
طيب ايه ممكن يكون السبب ؟؟
في اسباب كتير و لكن من ضمن الاسباب اللي ممكن توصلنا للحاله دي هي اني اكون مركز في جوانب معينه من حياتي علي حساب جوانب تانيه انا مهملها رغم انها ممكن تكون مهمه بالنسبه لي.
في جوانب كتيره من حياتنا بتقع مننا و احنا في دوامه الحياه و الشغل فبيحصل حاله عدم توازن و عدم رضا.
ممكن نستغرب اكتر لما نعرف العكس ... ان في ناس بتقول او فاكره انها سعيده في حياتها بس هي برضه من جواها عندها نفس الاحساس.
يعني ايه ؟؟ برضه مش فاهم
المقصود هنا هو اني اعرف ايه هي الجوانب المهمه بالنسبه لي عشان اديها الأهتمام الكافي. ولما تاخد الاهتمام الكافي يحصل عندي نوع من انواع التوازن و الرضا النفسي.
جوانب الحياه كتيره و لكن في 8 جوانب هي تعتبر اكتر حاجه مهمه. من ضمنها مثلا الشغل , الاسره , الصحه , المال , التعليم , الناحيه الدينيه و الروحانيه , الاصدقاء و الترفيه و التسليه.
آه كده بقي فهمت ... يعني لازم اهتم بالجوانب دي كلها زي بعض عشان يحصل التوازن و الرضا النفسي.. تمام كده
تمام كده ايه ؟؟؟ لأ طبعا كل واحد فينا عنده الجوانب المهمه الخاصه به و دي بتختلف من شخص لاخر...
يا سلام !!! بتختلف ليه بقي؟؟؟
بتختلف علي حسب حاجات كتير و لكن من اهمها مجموعه القيم و المعتقدات بتاعته اللي هي بتشكل اهتماماته و بالتالي اهدافه اللي عايز يحققها.
و هنا بقي ييجي التوازن اللي هو معناه اني احقق الرضا لجوانب حياتي علي حسب اهميتها ... يعني ممكن واحد يحس بالتوازن لما يدي اهتمام كتير لاسرته و شغله و صحته و يدي اهتمام بدرجه اقل للاصدقاء مثلا.
جميل جدا ... اعرف بقي ازاي الجوانب المهمه في حياتي عشان اشتغل عليها ؟؟
في ادوات بتساعدنا علي اننا نعرف الجوانب المهمه في حياتنا و اد ايه احنا مبسوطين منها. من ضمنها اداه اسمها عجله الحياه ... دي بتساعدني انها تديني صوره واضحه لحالتي في الفتره الحاليه و درجه رضائي عن كل جانب من جوانب حياتي.
مش كلنا حنقدر نستخدم الادوات لوحدنا. وهنا بقي ييجي دور اللايف كوتش اللي ممكن يساعدنا نحدد ايه الجوانب المهمه في حياتنا من وجه نظرنا و اد ايه درجه رضاؤنا عنها.بعد كده تيجي الخطوه التانيه ان اللايف كوتش يساعدنا نحط خطه عمل عشان نحسن الجوانب اللي محتاجه اهتمام و يتابع مدي تقدمنا.
شاركونا تجاربكم و افكاركم و هل مريتوا بالحاله دي قبل كده؟؟
شاركونا تجاربكم و افكاركم و هل مريتوا بالحاله دي قبل كده؟؟