المعتقدات و القيم
هو في فرق بينهم؟؟
اه في فرق فعلا ... بس المهم ان الاتنين بيأثروا علي سلوكيلتنا و مواقفنا و نظرتنا و ردود افعالنا للامور المختلفه.
المعتقدات هي حاجات احنا مقتنعين بيها و متقبلينها و مقتنعين انها حقيقه من غير اي اثبات ليها انها حقيقه. غالبا مصدر المعتقدات دي متعلق بالثقافه أو الدين أو النشأه و كمان من اللي بنشوفه و نسمعه و نتعلمه من خبراتنا في الحياه.
غالبا المعتقدات دي بيبقي فيها تعميم شويه و بتكون محفوره جوانا. المعتقدات بتاعتنا دي هي اللي بتأثر علي منظومه القيم بتاعتنا.
المعتقدات دي ممكن تكون صحيحه او مش صحيحه و لكن هي بالنسبه لينا مليون في الميه صحيحه !!!
طيب المعتقدات دي زي ايه؟
مثال : الكدب حرام ... ايه ده هو مش حرام ؟؟ اه في ناس مش مقتنعه ان الكدب مش حرام و شايفه ان ده شطاره
انا مقتنع اني فاشل و مش بانجح في اي حاجه
واحده مقتنعه ان كل الرجاله خاينين ... ايه ده هو مش كل الرجاله خاينين ؟؟؟ مش عارف بصراحه 😊
طيب ايه بقي القيم؟؟؟
القيم هي المبادئ و الحاجات المهمه بالنسبه لينا في حياتنا و بيكون مصدرها معتقداتنا و بتأثر علي سلوكياتنا و شخصياتنا
زي ايه ؟؟
الأمانه ... الطموح ... التقدير ... المسئوليه ... الأحترام ... الشجاعه ... العطاء ... الأيثار ...
القيم بتاعتنا دي ممكن تتغير مع الوقت و الخبرات الجديده المكتسبه و التعليم و ...
طيب ايه علاقات الحاجات دي ببعض؟؟؟
معتقداتنا دي بيطلع منها منظومه القيم بتاعتنا اللي هي بالتالي بتشكل مواقفنا و بعدها افعالنا و سلوكياتنا كلها.
يبقي عشان اصلح افعال او سلوكيات لازم اصلح المعتقدات الخاطئه اللي بالتالي مأثره علي قيمنا و سلوكياتنا و افعالنا.
نفهم من كده ان المعتقدات ممكن تتغبر ؟؟؟ اه ممكن تتغير
هنا بقي بيجي دور اللايف كوتش اللي هو بيقدر يساعدك علي انك تعرف الاول ايه معتقداتك و بعد كده يشوف معاك ايه اللي منها محتاج يتغير و يشتغل معاك عليها.
مثلا كان في واحده معتقده انها مش حتتجوز خالص لانها كل ما تعمل مقابله جواز تفشل. فتكون عندها اعتقاد انها مش مقبوله خالص و انها مش صالحه انها تعيش تجربه الجواز. فده قلب معاها بعد كده انها ترفض تعمل اي مقابله جواز او تتعرف علي حد عشان ماتعيدش تجربه الرفض تاني.
في المثال ده ... المعتقد انها مش مقبوله ... وصل معاها للرفض ... اللي بالتالي خلاها تعمل موقف امتناع عن التعرف علي اي حد او انها تدخل تجربه خطوبه.
يبقي لازم هي تغير المعتقد الخاطئ عشان تقدر ترجع تاني يبقي عندها ثقه انها ممكن تتعرف علي حد او تروح مقابله و هي مقتنعه انه حتي لو حصل رفض ده مش بيعيبها في حاجه. و هنا بقي يجي دور اللايف كوتش اللي بيمشي معاها عشان يعرف اسباب المعتقد ده و ازاي يقدر يغيره.
شاركونا حكايتكم و مواقفكم اللي بينت ليكم ان في معتقدات محتاجه تتغير و لو محتاجين اي مساعده كلموني عشان نبتدي مع بعض اول خطوه في طريق التحرر من اي معتقدات بتوقف حياتنا و تخلينا مش عرفين نتقدم.
